Hér er minn annar bjór frá þeim Mikkeller.  Þessi lofar góðu enda er ég farinn að kunna ansi vel við IPA stílinn.  Danir virðast vera að ná góðum tökum á IPA ef marka má t.d. Nørrebro Bryhus IPA og svo þennan fína karl.  Herlegheitin byrja strax og ofan í glas er komið því þetta er gullfallegur bjór, gulur og mattur með ægilega fínan og mjúkan froðuhaus.  Í nefi má finna hunang, gras eða hey og svo humla.  Í munni mætir manni höggbylgja sem nánast rotar bragðlaukana með snörpum humlum og þægilegri beiskju sem fer svo út í ögn súrt grape eða blóðappelsínu það ríkir þó einhver sætur blær í gegnum allan sopann.  Já þetta er afar gómsætur og bragðmikill bjór með mikla fyllingu og svo þægilegan eftirleik.  Þessi hressandi bjór sæmir sér líklega afar vel með mat af ýmsum toga já eða bara sem eins konar lystauki til að vekja sofandi bragðlauka fyrir matarboðið.  Já góður bjór og betri en fyrri bjórinn sem ég smakkaði frá þeim, Beer Geek Breakfast.