Bjórbókin hefur beðið lengi eftir þessum bjór.  Nýr íslenskur bjór sem kallaður er "sælkerabjór".  Væntingarnar eru miklar.  Þetta er fallegur bjór í glasi, gylltur tær og glæsilegur með létta  froðu.  Bjórinn kemur strax á óvart þegar kemur að nefi,  því hér eru tærir humlar í aðalhlutverki í bland við einhvern sætan keim sem gæti verið malt en minnir dálítið á amarillo humla.  Já gaman. Í munni er mikil fylling, kitlandi gos og hressandi beiskja frá brakandi humlunum.  Maltið er svo tvinnað inn í að mikilli nákvæmni og skapar skemmtilegt og þægilegt mótspil við humlana, einhver karamellukeimur lurir í bakgrunni.  Já ÖB menn hitta hér naglann á höfuð hins íslenska bjórþambara.  Þeir taka litla áhættu en hafa jafnframt skapað bjór sem stendur upp úr hinni íslensku bjórflóru.  Já líklega besti bjór Íslands.